Condicións de servizo de Google

En vigor a partir do 31 de marzo de 2020 | Versións arquivadas | Descargar en PDF

Aspectos que se tratan nestas condicións

Sabemos que resulta tentador saltar estas Condicións de servizo, pero é importante que saibas o que podes esperar de nós cando utilizas os servizos de Google e o que nós esperamos de ti.

Estas Condicións de servizo reflicten o modo en que funciona Google, as leis que se aplican á nosa compañía e determinados aspectos que para nós sempre foron certos. Como resultado, as condicións mencionadas axudan a definir a relación de Google contigo mentres interactúas cos nosos servizos. Por exemplo, estas condicións inclúen as seguintes seccións:

• Que podes esperar de nós, onde se describe como fornecemos e desenvolvemos os nosos servizos.
• Que esperamos de ti, onde se establecen determinadas regras de uso dos nosos servizos.
• Contido dos servizos de Google, que describe os dereitos de propiedade intelectual sobre o contido que atopas nos nosos servizos (tanto se ese contido che pertence a ti como a Google ou a outras partes).
• En caso de que se produzan problemas ou desacordos, onde se describen outros dereitos legais que tes e o que podes esperar en caso de que alguén infrinxa esas condicións.

Resulta importante entender estas condicións, xa que, mediante o uso dos nosos servizos, considerarase que as aceptas.

Ademais destas condicións, tamén publicamos unha Política de privacidade. Aínda que non forma parte destas condicións, recomendámosche que a leas para entender mellor como actualizar, xestionar, exportar e eliminar a túa información.

Fornecedor de servizo

Os servizos de Google serán fornecidos e contrataranse a través de:

Google LLC
empresa organizada segundo as leis do estado de Delaware, EUA, e rexida polas leis estadounidenses

1600 Amphitheatre Parkway
Mountain View, California 94043
Estados Unidos

Requisitos de idade

Se es menor da idade necesaria para xestionar a túa propia Conta de Google, deberás dispoñer do permiso do teu pai, da túa nai ou do teu titor legal para poder utilizar unha Conta de Google. Fai que un deles lea estas condicións contigo.

Se es un pai ou nai ou un titor legal e permites ao teu fillo ou filla utilizar os servizos, estas condicións aplicaranse ao teu caso e serás responsable da actividade do teu fillo nos servizos.

Algúns servizos de Google teñen requisitos de idade adicionais, tal e como se describe nas condicións e políticas específicas do servizo.

A túa relación con Google

Estas condicións axudan a definir a relación entre ti e Google. En termos xerais, fornecémosche permiso para utilizar os nosos servizos se aceptas respectar estas condicións, nas que se reflicte o modo en que funciona a empresa Google e como gañamos diñeiro. Cando falamos de “Google”, “nós” e “o noso" ou "a nosa”, facemos referencia a Google LLC e os seus colaboradores.

Que podes esperar de nós

Ofrecer unha ampla gama de servizos útiles

Ofrecemos unha ampla gama de servizos que están suxeitos a estas condicións, entre os que se inclúen:

• aplicacións e sitios (como a Busca e Maps)
• plataformas (como Google Play)
• servizos integrados (como Maps, inseridos en aplicacións ou sitios doutras empresas)
• dispositivos (como Google Home)

Os nosos servizos están deseñados para funcionar conxuntamente, facendo que che resulte máis fácil pasar dunha actividade a outra. Por exemplo, Maps pode lembrarche que te dirixas a unha cita que tes en Google Calendar.

Mellorar os servizos de Google

Desenvolvemos constantemente novas tecnoloxías e funcións para mellorar os nosos servizos. Por exemplo, investimos en intelixencia artificial que usa a aprendizaxe mecánica para detectar e bloquear spam e software malicioso, así como para ofrecerche funcións innovadoras, tales como as traducións simultáneas. Como parte desta mellora continua, ás veces engadimos ou eliminamos funcións e funcionalidades, aumentamos ou diminuímos os límites nos nosos servizos e incorporamos novos servizos ou deixamos de ofrecer outros antigos.

Se realizamos cambios materiais que afecten negativamente ao teu uso dos nosos servizos ou se deixamos de ofrecer algún deles, enviarémosche un aviso cunha antelación razoable e darémosche a oportunidade de exportar o teu contido da túa Conta de Google mediante Google Takeout, excepto en situacións de urxencia, como para evitar usos inadecuados, responder a requisitos legais ou solucionar problemas de seguranza e operatividade.

Que esperamos de ti

Seguir estas condicións e as condicións adicionais específicas do servizo

O permiso que che outorgamos para utilizar os nosos servizos continuará en vigor mentres cumpras coas túas responsabilidades que figuran en:

• estas condicións
• as condicións adicionais específicas do servizo, nas que poderían, por exemplo, incluírse cousas como requisitos de idade adicionais

Tamén che facilitamos varias políticas, centros de axuda e outros recursos para responder preguntas comúns e para establecer as expectativas sobre o uso dos nosos servizos. Entre estes recursos inclúense a nosa Política de privacidade, o Centro de axuda sobre copyright, o Centro de seguranza e outras páxinas ás que se pode acceder desde o noso sitio de políticas.

Aínda que che damos permiso para utilizar os nosos servizos, manteremos os dereitos de propiedade intelectual sobre eles.

Respectar os demais

Moitos dos nosos servizos permítenche interactuar con outros usuarios. Google quere manter un ambiente respectuoso para todos, o cal implica que debes seguir estas regras de conduta básicas:

• Cumprir coas leis aplicables, incluídos o control das exportacións, as sancións e as leis de tráfico de persoas.
• Respectar os dereitos dos demais, incluídos os de privacidade e propiedade intelectual.
• Non abusar doutras persoas nin danalas a elas nin a ti mesmo (ou ameazar e fomentar estes abusos ou danos); por exemplo, enganando, defraudando, difamando, intimidando, acosando ou perseguindo outras persoas.
• Non usar inadecuadamente, danar ou interromper os servizos, nin tampouco interferir neles.

As nosas políticas e condicións adicionais específicas do servizo, que todos os usuarios dos servizos deben cumprir, ofrecen máis detalles acerca das condutas adecuadas. Se detectas que outros usuarios non están cumprindo estas normas, moitos dos nosos servizos permitiranche informar dun uso inadecuado. Se tomamos medidas fronte a un informe de uso inadecuado, tamén garantiremos un proceso xusto, tal e como se describe na sección Toma de medidas en caso de problemas.

Permiso para utilizar o teu contido

Algúns dos nosos servizos están deseñados para permitirche cargar, enviar, almacenar, enviar, recibir ou compartir o teu contido. Non tes obriga ningunha de fornecer ningún contido aos nosos servizos e es libre de escoller o contido que queres fornecer. Se escolles cargar ou compartir contidos, asegúrate de dispoñer dos dereitos necesarios para facelo e de que os contidos sexan legais.

Licenza

O teu contido continuará sendo teu, o cal significa que conservarás todos os dereitos de propiedade intelectual sobre el. Por exemplo, se tes dereitos de propiedade intelectual sobre o contido creativo creado por ti, como as recensións que escribes. Tamén podes ter dereito a compartir o contido creativo doutro usuario se che concedeu permiso.

Precisaremos que nos concedas o teu permiso se os teus dereitos de propiedade intelectual restrinxen o noso uso do teu contido. Outorgarás ese permiso a Google a través desta licenza.

Que aspectos están cubertos

Esta licenza afecta ao teu contido se este está protexido por dereitos de propiedade intelectual.

Que aspectos non están cubertos

• Esta licenza non afecta aos teus dereitos de privacidade (só afecta aos teus dereitos de propiedade intelectual).
• Esta licenza non cubre os seguintes tipos de contidos:
• A información baseada en feitos dispoñible publicamente e fornecida por ti, como as correccións no enderezo dun negocio local. Esa información non require unha licenza porque se considera coñecemento común que todos os usuarios poden utilizar.
• Os comentarios que envíes, como, por exemplo, suxestións para mellorar os nosos servizos. Os comentarios trátanse máis adiante, na sección Comunicacións relacionadas co servizo.

Alcance

Esta licenza defínese como:

• Mundial, o cal significa que é válida en calquera lugar do mundo.
• Non exclusiva, o cal quere dicir que podes outorgar licenza sobre o teu contido a outros usuarios.
• Sen dereitos de autor, o cal significa que non se debe pagar ningunha cantidade por esta licenza.

Dereitos

Esta licenza permítelle a Google:

• Aloxar, reproducir, distribuír, comunicar e utilizar o teu contido (por exemplo, para gardar o contido nos nosos sistemas e poder acceder a el desde calquera lugar).
• Publicar, executar ou mostrar publicamente o teu contido se o estableciches como visible para os demais.
• Modificar e crear obras derivadas baseadas no teu contido, cambiándolle o formato ou traducíndoo.
• Asignar sublicenzas destes dereitos a:
• Outros usuarios, a fin de permitir aos servizos funcionar do modo para o que foron deseñados, permitíndoche compartir fotos coas persoas que escollas.
• Os nosos contratistas, que asinaron contratos connosco que cumpren con estas condicións, só para os fins descritos a continuación na sección Obxectivo.

Obxectivo

O obxectivo desta licenza limítase a:

• Xestionar e mellorar os servizos, o cal implica permitir a estes funcionar da maneira para a que foron deseñados e crear funcións e funcionalidades novas. Aquí inclúese o uso de sistemas automatizados e algoritmos para analizar o teu contido:
  • En busca de spam, software malicioso e contido ilegal.
  • Para recoñecer padróns en datos, como, por exemplo, para determinar cando suxerir un novo álbum en Google Fotos a fin de gardar xuntas as fotos relacionadas.
  • Para personalizar os nosos servizos, como, por exemplo, fornecendo recomendacións e resultados da busca, contidos e anuncios personalizados (opción que podes cambiar ou desactivar en Configuración de anuncios).
  Esta análise prodúcese cando se envía, recibe ou almacena o contido.
• Utilizar contidos compartidos publicamente para promover os servizos. Por exemplo, para promover unha aplicación de Google podemos citar unha recensión escrita por ti. Ademais, para promover Google Play, podemos mostrar unha captura de pantalla da aplicación que ofreces en Play Store.
• Desenvolver novas tecnoloxías e servizos para Google de conformidade con estas condicións.

Duración

Esta licenza durará mentres o teu contido estea protexido por dereitos de propiedade intelectual.

Se eliminas calquera contido cuberto por esta licenza dos nosos servizos, os nosos sistemas deixarán de ofrecer ese contido publicamente nun prazo de tempo razoable. Hai dúas excepcións:

• Se xa compartiches o teu contido con outros usuarios antes de eliminalo. Por exemplo, se compartiches unha foto cun amigo que, a continuación, realizou unha copia desta ou a compartiu de novo, esa foto poder continuar aparecendo na Conta de Google do teu amigo aínda que a elimines da túa.
• Se publicas os teus contidos a través dos servizos doutras empresas, os motores de busca, incluída a Busca de Google, poden continuar buscando e amosando o teu contido como parte dos seus resultados de busca.

Uso dos servizos de Google

A túa conta de Google

Se cumpres este requisito de idade, poderás crear unha Conta de Google. Algúns servizos requiren que teñas unha Conta de Google para poder usalos (por exemplo, se queres utilizar Gmail, precisas ter unha Conta de Google para ter un lugar ao que enviar e recibir o correo electrónico).

Es responsable da túa actividade coa Conta de Google, o que inclúe levar a cabo as medidas necesarias para protexela, e recomendámosche que utilices a Revisión de seguranza con regularidade.

Uso dos servizos de Google en nome dunha organización

Moitas organizacións, como empresas, organizacións sen ánimo de lucro e escolas, benefícianse dos nosos servizos. Para utilizar os nosos servizos en nome dunha organización:

• Un representante autorizado desa organización deberá aceptar estas condicións.
• O administrador da túa organización pode asignarche unha Conta de Google. Ese administrador pode esixirche cumprir normas adicionais e pode desactivar a túa Conta de Google ou acceder a ela.

Comunicacións relacionadas cos servizos

Para ofrecerche os nosos servizos, en ocasións enviarémosche notificacións de servizo e outra información. Para obter máis información sobre como nos comunicaremos contigo, consulta a Política de privacidade de Google.

Se escolles enviarnos comentarios, como, por exemplo, suxestións de mellora dos nosos servizos, podemos usalos sen ningunha obriga pola túa banda.

Contido dos servizos de Google

O teu contido

Algúns dos nosos servizos ofrécenche a oportunidade de mostrar o teu contido publicamente (por exemplo, podes publicar unha recensión dun produto ou dun restaurante escrita por ti ou podes cargar unha publicación de blog creada por ti).

• Consulta a sección Permiso para utilizar o teu contido para obter máis información acerca dos teus dereitos sobre o teu contido e sobre como se utiliza este nos nosos servizos
• Consulta a sección Eliminación do teu contido para obter información acerca de por que e como é posible que eliminemos contidos xerados polo usuario dos nosos servizos.

Se cres que alguén está infrinxindo os teus dereitos de propiedade intelectual, podes enviarnos un aviso da infracción e tomaremos as medidas correspondentes. Por exemplo, suspenderemos ou pecharemos as Contas de Google dos infractores do copyright reincidentes, tal e como se describe no noso Centro de axuda sobre copyright.

Contido de Google

Algúns dos nosos servizos inclúen contido pertencente a Google (por exemplo, gran parte das ilustracións visuais que se ven en Google Maps). Podes utilizar o contido de Google do xeito permitido por estas condicións e as condicións adicionais específicas do servizo, pero Google conservará os dereitos de propiedade intelectual que teña sobre o contido. Non retires, ocultes nin modifiques as marcas, logotipos ou avisos legais. Se queres utilizar as nosas marcas ou logotipos, consulta a páxina Permisos da marca de Google.

Outros contidos

Finalmente, algúns dos nosos servizos proporciónanche acceso a contidos que pertencen a outras persoas ou organizacións (por exemplo, á descrición do propietario dunha tenda do seu propio negocio ou a un artigo de xornal mostrado en Google News). Non poderás utilizar este contido sen o permiso desa persoa ou organización, ou se non o permite a lexislación. As opinións expresadas no contido doutras persoas ou organizacións pertencen a estes e non reflicten necesariamente as opinións de Google.

Software nos servizos de Google

Algúns dos nosos servizos inclúen software que se pode descargar. Dámosche permiso para utilizar ese software como parte dos servizos.

Esta licenza que che proporcionamos defínese como:

• Mundial, o cal significa que é válida en calquera lugar do mundo.
• Non exclusiva, o cal significa que podemos outorgar licenza sobre o software a outros usuarios.
• Sen dereitos de autor, o cal significa que non se debe pagar ningunha cantidade por esta licenza.
• Persoal, o cal quere dicir que non é extensible a ninguén máis.
• Non cedible, o cal quere dicir que non podes ceder a licenza a ninguén máis.

Algúns dos nosos servizos inclúen software ofrecido con condicións de licenza de código aberto que che facilitamos. En ocasións, existen disposicións na licenza de código aberto que anulan explicitamente partes destas condicións. Polo tanto, asegúrate de ler esas licenzas.

Non se pode copiar, modificar, distribuír, vender ou arrendar ningunha parte dos nosos servizos ou software. Do mesmo xeito, non se pode realizar enxeñaría inversa nin tentar extraer o código fonte a non ser que se teña o noso permiso por escrito ou ben que a lexislación aplicable o permita.

Se un servizo require ou inclúe software que se pode descargar, este software poderá actualizarse automaticamente no teu dispositivo cando haxa unha versión ou función nova dispoñible. Algúns servizos permítenche axustar a túa configuración da actualización automática.

En caso de que se produzan problemas ou desacordos

Por lei, tes dereito a (1) desfrutar dun servizo dunha certa calidade e a (2) gozar de distintos métodos de corrección dos problemas que poidan xurdir. Estas condicións non limitan nin exclúen ningún deses dereitos. Por exemplo, se es un consumidor, entón segues gozando de todos os dereitos legais concedidos aos consumidores segundo a lexislación aplicable.

Garantía

Google fornece os seus servizos cun grao razoable de competencia e dilixencia. Pedímosche que, se non cumprimos co nivel de calidade descrito nesta garantía, nolo comuniques e traballaremos contigo para tentar solucionar o problema.

Exencións de responsabilidades

Os únicos compromisos que adquirimos en relación cos nosos servizos (como o seu contido e funcións específicas ou a súa fiabilidade, dispoñibilidade e capacidade para satisfacer as túas necesidades) (1) descríbense na sección Garantía, (2) indícanse nas condicións adicionais específicas do servizo ou (3) fornécense conforme á lexislación aplicable. Non aceptamos ningún outro compromiso relacionado cos nosos servizos.

A non ser que así o esixa a lei, non ofreceremos garantías implícitas, como as de comerciabilidade, adecuación para un fin en particular e non infracción.

Responsabilidades

Para todos os usuarios

Estas condicións só limitan as nosas responsabilidades do xeito permitido pola lexislación aplicable. Especificamente, estas condicións non limitan a responsabilidade de Google en caso de morte ou lesións persoais, fraude, falseamento de información, neglixencia grave ou conduta malintencionada deliberada.

Ademais dos dereitos e responsabilidades descritos nesta sección (en caso de que se produzan problemas ou desacordos), Google non será responsable doutras perdas, a non ser que se produzan debido a un incumprimento pola nosa banda destas condicións ou das condicións adicionais específicas do servizo.

Só para usuarios de empresa e organizacións

Se es un usuario de empresa ou unha organización, na medida permitida pola lei aplicable:

• Deberás indemnizar a Google e os seus directores, directivos, empregados e contratistas polos procedementos legais de terceiros (incluídas accións emprendidas por autoridades gobernamentais) derivados ou relacionados co teu uso ilegal dos servizos, ou pola infracción destas condicións ou de condicións adicionais específicas do servizo. Esta indemnización cubrirá calquera responsabilidade ou gasto derivado de reclamacións, perdas, danos, sentenzas, multas, custos de litixio e custas procesuais.
• Google non terá as seguintes responsabilidades:
• perda de beneficios, ingresos, oportunidades empresariais, reputación ou previsión de aforros
• perdas indirectas ou resultantes
• danos punitivos
• A responsabilidade total de Google relacionada con estas condicións ou derivada delas está limitada como máximo a (1) 500 $ ou ao (2) 125 % das tarifas que pagases para utilizar os servizos correspondentes nos 12 meses anteriores á infracción.

Se estás legalmente exento de determinadas responsabilidades, incluída a indemnización, estas non se che aplicarán de acordo con estas condicións. Por exemplo, as Nacións Unidas gozan de determinadas exencións de obrigas legais e estas condicións non anularán as devanditas exencións.

Toma de medidas en caso de problemas

Antes de tomar as medidas descritas a continuación, enviarémosche un aviso cunha antelación razoable no que se describirá o motivo da nosa medida e ofrecerémosche a oportunidade de corrixir o problema, a non ser que consideremos que deste xeito as consecuencias serán as seguintes:

• Provocar danos ou a derivación de responsabilidades a un usuario, un terceiro ou a Google.
• Infrinxir a lei ou a orde dunha autoridade legal.
• Poñer en perigo unha investigación.
• Poñer en risco o funcionamento, a integridade ou a seguranza dos nosos servizos.

Eliminación do teu contido

Se temos motivos razoables para crer que o teu contido (1) infrinxe estas condicións, as condicións ou políticas adicionais específicas do servizo, (2) infrinxe a lexislación aplicable ou (3) pode danar os nosos usuarios, a terceiros ou a Google, reservamos o dereito de retirar o contido na súa totalidade ou en parte de acordo coa lexislación aplicable. Como exemplos inclúense a pornografía infantil, contidos que facilitan o tráfico de persoas ou o acoso e os que infrinxen os dereitos de propiedade intelectual doutras persoas.

Suspensión ou cancelación do teu acceso aos servizos de Google

Google reserva o dereito a suspender ou cancelar o teu acceso aos servizos ou eliminar a túa Conta de Google se sucede algo do indicado a continuación:

• Se cometes unha infracción importante ou repetida destas condicións, as condicións adicionais específicas do servizo ou as políticas
• Estamos obrigados a facelo para cumprir cun requirimento legal ou unha orde xudicial.
• Temos motivos razoables para crer que a túa conduta ocasiona danos ou a aplicación de responsabilidades a un usuario, terceiro ou Google (por exemplo, ao piratear, realizar phishing, acosar, enviar spam, enganar outros usuarios ou acceder a contidos que non che pertenzan).

Se cres que a túa Conta de Google se suspendeu ou cancelou debido a un erro, podes presentar unha apelación.

Por suposto, sempre terás a liberdade de deixar de utilizar os nosos servizos cando queiras. Se deixas de utilizar un servizo, gustaríanos saber os motivos para poder continuar mellorándoo.

Resolución de disputas, lexislación aplicable e tribunais

Para obter máis información sobre como poñerte en contacto con Google, accede á páxina de contacto.

As leis de California rexerán todas as disputas que xurdan destas condicións ou estean relacionadas con elas, coas condicións adicionais específicas dos servizos ou con calquera servizo relacionado, independentemente das disposicións sobre conflitos de leis. Estas disputas resolveranse exclusivamente nos tribunais federais ou estatais do condado de Santa Clara, no estado de California (EUA), e tanto ti como Google aceptades sometervos á xurisdición persoal destes tribunais.

Na medida en que a lexislación local aplicable impida a resolución destas disputas nun tribunal de California, poderás presentalas nos tribunais locais. Do mesmo xeito, se a lexislación local aplicable impide ao teu tribunal local aplicar a lei de California para resolver estas disputas, estas rexeranse polas leis locais pertinentes do teu país, estado ou outro lugar de residencia.

Acerca destas condicións

Por lei tes determinados dereitos que non se poden limitar por un contrato como estas condicións de servizo. Estas condicións non están destinadas de maneira ningunha a restrinxir eses dereitos.

Estas condicións describen a relación entre ti e Google. Non crean ningún dereito legal para outras persoas ou organizacións, aínda que estas se beneficien desa relación rexida por estas condicións.

Queremos conseguir que estas condicións resulten fáciles de entender, polo que utilizamos exemplos dos nosos servizos. Pero é posible que non todos os servizos mencionados estean dispoñibles no teu país.

Se estas condicións entran en conflito coas condicións adicionais específicas do servizo, estas condicións serán as que rexan o servizo.

No caso de que unha condición determinada non sexa válida ou de obrigado cumprimento, o resto de condicións non se verán afectadas.

Se non cumpres estas condicións ou as condicións adicionais específicas do servizo e non tomamos ningunha medida de forma inmediata, non se interpretará que Google renuncia aos dereitos dos que poida dispoñer, como, por exemplo, levar a cabo accións no futuro.

Podemos actualizar estas condicións e as condicións adicionais específicas do servizo (1) para reflectir os cambios nos nosos servizos ou o modo en que facemos negocios (por exemplo: cando engadimos novos servizos, funcións, tecnoloxías, prezos e vantaxes ou ben eliminamos os antigos), (2) por motivos legais, normativos ou de seguranza, ou (3) para evitar usos inadecuados ou danos.

Se cambiamos estas condicións ou as condicións adicionais específicas do servizo, enviarémosche un aviso cunha antelación razoable e terás a oportunidade de revisar os cambios, excepto (1) cando lancemos unha función ou un servizo novo ou (2) en situacións de urxencia; por exemplo, para evitar usos inadecuados continuados ou para responder a requisitos legais. Se non estás de acordo coas novas condicións, deberás eliminar o teu contido e deixar de usar os servizos. Tamén podes finalizar a túa relación connosco cando queiras. Tan só tes que pechar a túa Conta de Google.

Definicións

colaborador

Entidade que pertence ao grupo de empresas de Google, é dicir, Google LLC e as súas filiais, incluídas as que fornecen servizos ao consumidor na UE, como Google Ireland Limited, Google Commerce Ltd e Google Dialer Inc.

consumidor

Persoa que utiliza servizos de Google para fins persoais non comerciais non relacionados coa súa actividade comercial, negocio ou profesión. (Consulta a definición de "usuario de empresa").

copyright

Dereito legal que permite ao creador dunha obra orixinal (por exemplo, unha publicación de blog, foto ou vídeo) decidir se outros usuarios poden utilizar esa obra orixinal e de que maneira o poden facer.

dereitos de propiedade intelectual

Dereitos sobre as creacións da mente humana, como invencións (dereitos de patente); obras literarias e artísticas (copyright); deseños (dereitos de deseño) e símbolos, nomes e imaxes utilizados comercialmente (marcas comerciais). Os dereitos de propiedade intelectual poden pertencerche a ti, a outra persoa ou a unha organización.

exención de responsabilidade

Declaración que limita as responsabilidades legais dun usuario.

garantía

Garantía de que un produto ou servizo funcionará conforme a un determinado estándar.

indemnizar ou indemnización

Obriga contractual dunha persoa ou organización de compensar as perdas sufridas por outra persoa ou organización derivadas de procedementos legais, como, por exemplo, demandas.

marca rexistrada

Símbolos, nomes e imaxes usados comercialmente e capaces de distinguir os artigos ou servizos dunha persoa ou organización dos doutra.

o teu contido

Cousas que escribes, cargas, envías, almacenas, recibes ou compartes con Google mediante os nosos servizos, por exemplo:

• Ficheiros que creas con Documentos, Follas de cálculo e Presentacións.
• Publicacións de blog que cargas a través de Blogger.
• Recensións que envías a través de Maps.
• Vídeos que almacenas en Drive.
• Correos electrónicos que envías e recibes a través de Gmail.
• Imaxes que compartes con amigos a través de Fotos.
• Itinerarios de viaxes que compartes con Google.

organización

Entidade legal (por exemplo, unha corporación, unha organización sen ánimo de lucro ou unha institución educativa) e non unha persoa física.

Regulamento da UE sobre as relacións entre as plataformas e as empresas

A normativa (UE) 2019/1150 de promoción da xustiza e a transparencia para usuarios de empresa de servizos de intermediación en liña.

responsabilidade

Perdas derivadas de calquera tipo de reclamación legal, baseada en contrato, agravio (incluída a neglixencia) ou outros motivos, e independentemente de se esas perdas puidesen anticiparse ou preverse.

servizos

Os servizos de Google que están suxeitos a estas condicións son os produtos e servizos enumerados en https://policies.google.com/terms/service-specific, entre os que se inclúen:

• aplicacións e sitios de Google (como a Busca e Maps)
• plataformas (como Google Play)
• servizos integrados (como Maps, inseridos en aplicacións ou sitios doutras empresas)
• dispositivos (como Google Home)

usuario de empresa

Persoa ou entidade distinta dun consumidor (consulta a definición de "consumidor").