Sheria na Masharti ya Google

Inatumika kuanzia 22 Mei 2024 | Matoleo yaliyowekwa kwenye kumbukumbu | Pakua PDF

Toleo la nchi: Marekani

Mambo yanayoshughulikiwa katika sheria na masharti haya

Tunafahamu kuwa unaweza kutaka kuruka Sheria na Masharti haya, lakini ni muhimu ujue mambo unayofaa kutarajia kutoka kwetu unapotumia huduma za Google na mambo tunayotarajia kutoka kwako.

Sheria na Masharti haya yanaonyesha jinsi biashara ya Google hufanya kazi, sheria zinazotumika katika kampuni yetu na mambo fulani ambayo tunaamini kila mara kuwa ya kweli. Kutokana na hayo, Sheria na Masharti haya yanasaidia kufafanua uhusiano wako na Google unapotumia huduma zetu. Kwa mfano, sheria na masharti haya yana mada zifuatazo:

• Mambo ambayo unaweza kutarajia kutoka kwetu, ambayo yanafafanua jinsi tunavyotoa na kubuni huduma zetu
• Mambo ambayo tunatarajia kutoka kwako, ambayo yanabainisha sheria fulani za kutumia huduma zetu
• Maudhui kwenye huduma za Google, ambayo yanabainisha haki za uvumbuzi kwenye maudhui unayopata katika huduma zetu — iwe maudhui hayo yanamilikiwa na wewe, Google au wengine
• Iwapo kutatokea matatizo ya kutokubaliana, ambayo yanafafanua haki zingine za kisheria ulizo nazo na mambo ya kutarajia iwapo mtu atakiuka sheria na masharti haya

Ni muhimu uelewe masharti haya kwa sababu, kwa kufikia au kutumia huduma zetu (iwe umeingia katika akaunti ya Google au la), unakubali masharti haya.

Mbali na sheria na masharti haya, pia huwa tunachapisha Sera ya Faragha. Tunakuhimiza uisome ili uelewe kwa njia bora jinsi unavyoweza kusasisha, kudhibiti, kuhamisha na kufuta taarifa zako.

Masharti

Mtoa huduma

Huduma za Google zinatolewa na, na unaingia katika mkataba na:

Google LLC
imepangwa kwa mujibu wa sheria za Jimbo la Delaware, Marekani na inafanya kazi kwa mujibu wa sheria za Marekani

1600 Amphitheatre Parkway
Mountain View, California 94043
Marekani

Masharti ya umri

Iwapo hujafikisha umri unaoruhusiwa kusimamia Akaunti yako mwenyewe ya Google, ni lazima uwe na ruhusa ya mzazi au mlezi anayejulikana kisheria, ya kutumia Akaunti ya Google. Tafadhali mwombe mzazi au mlezi wako anayejulikana kisheria asome sheria na masharti haya pamoja nawe.

Iwapo wewe ni mzazi au mlezi unayejulikana kisheria na unamruhusu mtoto wako atumie huduma, basi sheria na masharti haya yanatumika kwako na unawajibikia shughuli za mtoto wako kwenye huduma.

Baadhi ya huduma za Google zina masharti ya ziada ya umri jinsi inavyobainishwa katika sera na sheria na masharti ya ziada ya huduma mahususi.

Uhusiano wako na Google

Sheria na masharti haya yanasaidia kufafanua uhusiano kati yako na Google. Tunapozungumza kuhusu “Google,” “sisi,” “tu-,” na “yetu,” tunamaanisha Google LLC na washirika wake. Kwa jumla, tunakupa ruhusa ya kufikia na kutumia huduma zetu iwapo utakubali kufuata sheria na masharti haya, ambayo yanaonyesha jinsi biashara ya Google hufanya kazi na jinsi tunavyochuma pesa.

Mambo unayoweza kutarajia kutoka kwetu

Kutoa aina nyingi ya bidhaa zinazofaa

Nyingi ya huduma hizi pia zinajumuisha maudhui ambayo unaweza kuyatiririsha au kuyashughulikia.

Huduma zingine zimebuniwa ili zifanye kazi pamoja, hatua inayokurahisishia hali ya kutoka kwenye shughuli moja hadi nyingine. Kwa mfano, iwapo tukio lako la Kalenda linajumuisha anwani, unaweza kubofya anwani hiyo na programu ya Ramani inaweza kukuonyesha jinsi ya kufika huko.

Kusanidi, kuboresha na kusasisha huduma za Google

Tunaendelea kubuni vipengele na teknolojia mpya ili kuboresha huduma zetu. Kwa mfano, tunatumia akiliunde na mfumo wa mashine kujifunza ili kukupa tafsiri za moja kwa moja pamoja na kutambua na kuzuia taka na programu hasidi kwa njia bora. Kama sehemu ya juhudi hizi za kuendelea kuboresha huduma zetu, wakati mwingine tunaongeza au kuondoa vipengele na utendaji, kuongeza au kupunguza vikomo vya huduma zetu na kuanza kutoa huduma mpya au kusimamisha za zamani. Wakati huduma inahitaji au ina programu inayoweza kupakuliwa au kupakiwa mapema, programu hiyo hujisasisha kiotomatiki wakati mwingine kwenye kifaa chako pindi kipengele au toleo jipya linapopatikana. Baadhi ya huduma hukuruhusu urekebishe mipangilio yako ya masasisho ya kiotomatiki.

Iwapo tutafanya mabadiliko muhimu ambayo yataathiri vibaya utumiaji wako wa huduma zetu au iwapo tutaacha kutoa huduma fulani, tutakupa arifa adilifu ya mapema, isipokuwa katika hali za dharura kama vile kuzuia matumizi mabaya, kushughulikia mahitaji ya kisheria au kushughulikia masuala ya kiusalama na utendakazi. Pia tutakupa fursa ya kuhamisha maudhui yako kutoka kwenye Akaunti yako ya Google kupitia Google Takeout, kwa mujibu wa sheria na sera zinazotumika.

Mambo tunayotarajia kutoka kwako

Fuata sheria na masharti haya na sheria na masharti ya ziada ya huduma mahususi

Pia unakubali kwamba Sera yetu ya Faragha inatumika katika utumiaji wako wa huduma zetu. Pia tunatoa nyenzo kama vile Kituo cha Usaidizi cha Hakimiliki, Kituo cha Usalama, Kituo cha Uwazi, na ufafanuzi wa teknolojia zetu kutoka kwenye tovuti yetu ya sera ili kujibu maswali ya kawaida na kuweka matarajio kuhusu utumiaji wa huduma zetu. Hatimaye, tunaweza kutoa tahadhari na maagizo mahususi ndani ya huduma zetu – kama vile vidirisha vya mazungumzo vinavyokuarifu kuhusu taarifa muhimu.

Ingawa tunakupa ruhusa ya kutumia huduma zetu, tunahifadhi haki zozote za uvumbuzi tulizonazo kwenye huduma.

Kuheshimu watu wengine

Sheria na masharti na sera zetu za ziada za huduma mahususi, kama vile Sera yetu Dhidi ya Matumizi Yasiyoruhusiwa ya AI Zalishi, zinatoa maelezo ya ziada kuhusu mwenendo unaofaa ambao kila mtu anayetumia huduma hizo lazima aufuate. Ikiwa utabaini kuwa watu wengine hawafuati amri hizi, huduma zetu nyingi zinakuruhusu uripoti matumizi mabaya. Ikiwa tutachukua hatua kutokana na ripoti ya matumizi mabaya, tutatoa pia mchakato wa hatua hiyo jinsi inavyoelezwa katika sehemu ya Kuchukua hatua iwapo kuna matatizo.

Usitumie vibaya huduma zetu

Watu wengi wanaofikia au kutumia huduma zetu wanaelewa kanuni za jumla zinazofanya intaneti iwe salama na wazi. Lakini inasikitisha kuwa, baadhi ya watu hawaheshimu kanuni hizo, kwa hivyo tunazieleza hapa ili tulinde watumiaji na huduma zetu dhidi ya kutumiwa vibaya. Kwa nia hiyo:

• kuweka programu hasidi
• kutuma taka, kudukua au kukwepa mifumo au hatua zetu za ulinzi
• kubadilisha mfumo ili kuondoa vizuizi vilivyowekwa na mtengenezaji, kutuma kidokezo hasidi, au kupachika kidokezo, isipokuwa kama sehemu ya mipango yetu ya usalama na majaribio ya hitilafu
• kufikia au kutumia huduma au maudhui yetu kwa njia za ulaghai au udanganyifu, kama vile:
• wizi wa data binafsi
• kutayarisha maudhui au kufungua akaunti bandia, ikiwa ni pamoja na maoni bandia
• kuwapotosha wengine ili wafikirie kuwa maudhui yaliyotokana na AI zalishi yalitayarishwa na binadamu
• kutoa huduma zinazoonekana kuwa ni zako (au za mtu mwingine) ilhali ukweli ni kuwa zimetoka kwetu
• kutoa huduma zinazoonekana kuwa zimetoka kwetu ilhali sivyo
• kutumia huduma zetu (ikiwa ni pamoja na maudhui ambayo huduma hizo hutoa) kukiuka haki za kisheria za mtu, kama vile mali ya uvumbuzi au haki za faragha
• kufanya utafiti wa kihandisi kwenye huduma au teknolojia yetu kuu, kama vile mifumo yetu ya mashine kujifunza, ili kupata siri za kibiashara au maelezo mengine tunayomiliki, isipokuwa kama inavyoruhusiwa na sheria inayotumika
• kutumia njia za kiotomatiki kufikia maudhui kutoka kwenye huduma zetu zozote kwa kukiuka maagizo yanayoweza kusomwa kwa mashine yaliyo kwenye kurasa zetu za wavuti (kwa mfano faili za robots.txt zisizoruhusu kutambaa, mafunzo au shughuli nyingine)
• kutumia maudhui ambayo yametayarishwa kwa AI kutoka kwenye huduma zetu kutengeneza mifumo ya mashine kujifunza au teknolojia zinazohusiana za AI
• kuficha au kuwakilisha kwa uongo utambulisho wako ili kukiuka masharti haya
• kutoa huduma zinazowahimiza wengine kukiuka masharti haya

Ruhusa ya kutumia maudhui yako

Baadhi ya huduma zetu zinakuruhusu upakie, uwasilishe, uhifadhi, utume, upokee au ushiriki maudhui yako. Huna wajibu wowote wa kuweka maudhui yoyote kwenye huduma zetu na una uhuru wa kuchagua maudhui ambayo ungependa kuweka. Iwapo utaamua kupakia au kushiriki maudhui, tafadhali hakikisha kuwa una haki zinazohitajika kufanya hivyo na kuwa maudhui ni halali.

Kutumia huduma za Google

Akaunti yako ya Google

Iwapo unatimiza masharti haya ya umri unaweza kufungua Akaunti ya Google unapohitaji. Baadhi ya huduma zinahitaji uwe na Akaunti ya Google ili ziweze kufanya kazi — kwa mfano, ili utumie Gmail, unahitaji Akaunti ya Google ili uwe na mahali pa kutuma na kupokea barua pepe yako.

Unawajibikia shughuli unazofanya kwenye Akaunti yako ya Google, ikiwa ni pamoja na kuchukua hatua zinazofaa za kulinda usalama wa Akaunti yako ya Google. Tunakuhimiza utumie tovuti ya Ukaguzi wa Usalama mara kwa mara.

Kutumia huduma za Google kwa niaba ya shirika au biashara

Mawasiliano yanayohusiana na huduma

Ili kukupa huduma zetu, wakati mwingine huwa tunakutumia matangazo ya huduma na maelezo mengine. Ili upate maelezo zaidi kuhusu jinsi tunavyowasiliana nawe, angalia Sera ya Faragha ya Google.

Iwapo utachagua kutupa maoni, kama vile mapendekezo ya kuboresha huduma zetu, tunaweza kuchukua hatua kutokana na maoni yako bila kuwa na wajibu wowote kwako.

Maudhui katika huduma za Google

Maudhui yako

Baadhi ya huduma zetu zinakuruhusu uzalishe maudhui asili. Google haitadai umiliki wa maudhui hayo.

Baadhi ya huduma zetu hukupa fursa ya kufanya maudhui yako yapatikane kwa umma — kwa mfano, unaweza kuchapisha bidhaa au maoni ya mkahawa uliyoandika au unaweza kupakia chapisho kwenye blogu ambalo umetunga.

• Angalia sehemu ya Ruhusa ya kutumia maudhui yako ili upate maelezo zaidi kuhusu haki zako katika maudhui yako na jinsi maudhui yako yanavyotumika kwenye huduma zetu
• Angalia sehemu ya Kuondoa maudhui yako ili upate maelezo ya sababu na jinsi tunavyoweza kuondoa maudhui yaliyotengenezwa na watumiaji kwenye huduma zetu

Iwapo unafikiri kuwa mtu fulani anakiuka haki zako za uvumbuzi, unaweza kutuma ilani ya ukiukaji na tutachukua hatua zinazofaa. Kwa mfano, huwa tunasimamisha au kufunga Akaunti ya Google ya watu wanaokiuka hakimiliki mara kwa mara jinsi inavyobainishwa katika Kituo chetu cha Usaidizi wa Hakimiliki.

Maudhui ya Google

Baadhi ya huduma zetu ni pamoja na maudhui yanayomilikiwa na Google — kwa mfano, michoro mingi unayoona kwenye Ramani za Google. Unaweza kutumia maudhui ya Google jinsi inavyoruhusiwa na sheria na masharti haya na sheria na masharti yoyote ya ziada ya huduma mahususi, lakini tunahifadhi haki zozote za uvumbuzi tulizonazo katika maudhui yetu. Usiondoe, kuficha au kubadilisha chapa, nembo au ilani zetu zozote za kisheria. Iwapo ungependa kutumia nembo au chapa zetu, tafadhali angalia ukurasa wa Ruhusa za Chapa za Google.

Maudhui mengine

Mwisho, baadhi ya huduma zetu zinakupa uwezo wa kufikia maudhui ya watu au mashirika mengine — kwa mfano, maelezo ya mmiliki wa duka kuhusu biashara yake mwenyewe au makala ya gazeti yanayoonyeshwa kwenye Google News. Hupaswi kutumia maudhui haya bila ruhusa ya mtu au shirika hilo au bila ruhusa ya kisheria. Maoni yanayotolewa kwenye maudhui ya watu au mashirika mengine ni yao na huenda hayawakilishi maoni ya Google.

Programu katika huduma za Google

Baadhi ya huduma zetu ni pamoja na programu zinazoweza kupakuliwa au zinazopakiwa mapema. Tunakupa ruhusa ya kutumia programu hiyo kama sehemu ya huduma.

Baadhi ya huduma zetu ni pamoja na programu ambayo inatolewa chini ya sheria na masharti ya leseni ya programu huria ambayo tunakupa. Wakati mwingine kuna sheria katika leseni ya programu huria ambayo inabatilisha kwa njia ya wazi sehemu za sheria na masharti haya, kwa hivyo tafadhali hakikisha kuwa unasoma leseni hizo.

Hupaswi kunakili, kubadilisha, kusambaza, kuuza au kupangisha sehemu yoyote ya huduma au programu zetu.

Iwapo kutatokea tatizo au kutokubaliana

Kanusho la dhima

Tulijijengea sifa nzuri kwa kutoa huduma muhimu na za kutegemewa kama vile huduma za Tafuta na Ramani za Google, na tunaendelea kuboresha huduma zetu ili kutimiza mahitaji yako. Hata hivyo, kwa mujibu wa sheria, tunatoa huduma bila dhima isipokuwa ibainishwe dhahiri katika sheria na masharti yetu ya ziada ya huduma mahususi. Sheria inatutaka tufafanue hili kwa kutumia lugha mahususi ya kisheria na tutumie herufi kubwa ili kusaidia kuhakikisha kuwa unaiona, ifuatavyo:

KWA MUJIBU WA SHERIA ZINAZOTUMIKA, TUNATOA HUDUMA ZETU “JINSI ZILIVYO” BILA ARABUNI ZOZOTE ZA MOJA KWA MOJA AU ZISIZOTAJWA, IKIWA NI PAMOJA NA ARABUNI ZISIZOTAJWA ZA UBORA KWA MAUZO, KUFAA KATIKA MADHUMUNI FULANI NA BILA UKIUKAJI. KWA MFANO, HATUBUNI DHIMA ZOZOTE KUHUSU MAUDHUI AU VIPENGELE VYA HUDUMA, IKIWA NI PAMOJA NA USAHIHI, UWEZO WA KUTEGEMEWA, UPATIKANAJI AU UWEZO WA KUTIMIZA MAHITAJI YAKO.

USITEGEMEE HUDUMA KWA USHAURI WA KIMATIBABU, KISHERIA, KIFEDHA AU USHAURI MWINGINE WA KITAALAMU. MAUDHUI YOYOTE KUHUSU MADA HIZO YAMETOLEWA KWA MADHUMUNI YA MAELEZO PEKEE NA HAYAPASWI KUTUMIKA BADALA YA USHAURI WA MTAALAMU ALIYEHITIMU.

Dhima

Kwa watumiaji wote

Sheria pamoja na sheria na masharti haya hujaribu kuleta usawa kati ya kile ambacho wewe au Google mnaweza kudaiana kukiwa na matatizo. Ndiyo maana sheria inamtaka kila mtu kuwajibikia wajibu fulani — lakini si mwingine — chini ya masharti haya.

Sheria na masharti haya yanadhibiti tu wajibu wetu kwa mujibu wa sheria inayotumika. Masharti haya hayadhibiti dhima ya kiasi cha juu cha ulegevu au matendo yasiyofaa yanayofanywa kimakusudi.

Kwa watumiaji wa kibiashara na mashirika pekee

Iwapo wewe ni mtumiaji wa kibiashara au shirika:

• Kwa mujibu wa sheria inayotumika, utafidia Google na wasimamizi, maafisa, wafanyakazi na wakandarasi wake kwa kesi yoyote ya kisheria ya washirika wengine (ikiwa ni pamoja na vitendo vya mamlaka za serikali) inayotokana au inayohusiana na utumiaji wako wa huduma kinyume cha sheria au ukiukaji wa sheria na masharti ya ziada ya huduma mahususi. Fidia hii inashughulikia dhima yoyote au matumizi yanayotokana na madai, hasara, uharibifu, maamuzi ya korti, faini, gharama za manza na ada za kisheria.
• Iwapo umeruhusiwa kisheria usitende majukumu fulani, ikiwa ni pamoja na ahadi ya kulipa, basi majukumu hayo hayatumiki kwako chini ya sheria na masharti haya. Kwa mfano, Umoja wa Mataifa hupata kinga fulani za wajibu wa kisheria na sheria na masharti haya hayabatilishi kinga hizo.

Kuchukua hatua iwapo matatizo yatatokea

Kabla ya kuchukua hatua kama ilivyoelezwa hapa chini, tutakupa arifa ya mapema panapowezekana kwa njia adilifu, tukueleze sababu iliyofanya tuchukue hatua na tukupe fursa ya kufafanua tatizo na kulirekebisha, isipokuwa ikiwa kufanya hivyo kunaweza:

• kusababisha madhara au dhima kwa mtumiaji, mtu au kampuni nyingine au Google
• kukiuka sheria au amri ya mamlaka ya utekelezaji wa sheria
• kuathiri uchunguzi
• kuathiri uendeshaji, maadili au usalama wa huduma zetu

Kuondoa maudhui yako

Iwapo maudhui yako yoyote (1) yanakiuka sheria na masharti haya, sera au sheria na masharti ya ziada ya huduma mahususi, (2) yanakiuka sheria inayotumika au (3) yanaweza kuwadhuru watumiaji wetu, washirika wengine au Google, basi tunahifadhi haki ya kuondoa baadhi ya maudhui au maudhui hayo yote kwa mujibu wa sheria inayotumika. Mifano ni pamoja na ponografia inayohusisha watoto, maudhui yanayofanikisha unyanyasaji au ulanguzi wa watu, maudhui ya kigaidi na maudhui yanayokiuka haki za uvumbuzi za mtu mwingine.

Kufunga au kusimamisha uwezo wako wa kufikia huduma za Google

Bila kuwekea kikomo haki zetu zozote zingine, Google inaweza kusimamisha au kufunga ufikiaji wako wa huduma au kufuta Akaunti yako ya Google ikiwa jambo lolote kati ya yafuatayo litafanyika:

• unapokiuka mara kwa mara au kwa kiasi kikubwa sheria na masharti, sheria na masharti ya ziada ya huduma mahususi
• tunatakiwa kufanya hivyo ili kutii mahitaji ya kisheria au amri ya mahakama
• matendo yako yanasababisha madhara au dhima kwa mtumiaji, mshirika mwingine au Google — kwa mfano, kwa kudukua, kuiba data binafsi, kunyanyasa, kutuma taka, kupotosha wengine au kukusanya maudhui ya wengine

Ili upate maelezo zaidi kuhusu kwa nini tunafunga akaunti na kinachotokea baada ya kufunga, angalia Ukurasa huu wa Kituo cha Usaidizi. Iwapo unaamini kuwa Akaunti yako ya Google imesimamishwa au kufungwa kimakosa, unaweza kukata rufaa.

Bila shaka, una uhuru wa kuacha kutumia huduma zetu wakati wowote. Iwapo utaacha kutumia huduma fulani, tutashukuru iwapo utatujulisha sababu ili tuweze kuendelea kuboresha huduma zetu.

Kusuluhisha mizozo, sheria ya serikali na mahakama

Kwa maelezo kuhusu jinsi ya kuwasiliana na Google, tafadhali tembelea ukurasa wetu wa mawasiliano.

Sheria ya California itasimamia mizozo yote inayotokana au inayohusiana na sheria na masharti haya, sheria na masharti ya ziada ya huduma mahususi au huduma zozote zinazohusiana, bila kujali ukinzani wa kanuni za sheria. Mizozo hii itasuluhishwa kwa njia ya kipekee katika mahakama za nchi au jimbo la Santa Clara, California, Marekani na wewe na Google mnakubali uamuzi wa eneo la mamlaka katika mahakama hizo.