Nerabeentzako pribatutasun-gida
Zure pribatutasuna Google-n
Hemen aurkituko dituzu pribatutasunari buruz egiten dizkiguten galdera nagusietako batzuen erantzunak; adibidez, Zer dira datuak? Informazio gehiago lortu nahi baduzu, irakurri Pribatutasun-gidalerroak.
Zure kokapena
Ezagutzen al du Google-k nire kokapena?
Internet darabilzunean, aplikazioek eta webguneek gutxi gorabehera non zauden kalkula dezakete, eta horixe bera egiten du Google-k ere. Halaber, baliteke Google-k zure kokapen zehatza ere jakitea, gailuaren ezarpenen arabera. (irakurri Zeinen zehatza da nire kokapena?).
Google-n bilaketak egiten dituzunean (adibidez, Bilaketa, Maps edo Google-ren Laguntzailea bidez), baliteke une horretako kokapena erabiltzea emaitza lagungarriagoak eskaintzeko. Adibidez, jatetxeak bilatzen badituzu, litekeena da emaitza lagungarrienen artean zure inguruko jatetxeak agertzea.
Irakurri Nola kudea dezakezu kokapena?
Nola aktibatu eta desaktiba dezaket kokapena?
Google-n bilaketak egiten dituzunean, zure kokapen zehaztugabea kalkulatzen du beti Google-k. Internetera konektatzen diren aplikazio edo webgune guztiek bezala, gailuaren IP helbidea oinarri hartuta kalkula dezake Google-k zure gutxi gorabeherako kokapena. Informazio gehiago lortzeko, irakurri Nola daki Google-k non nagoen?.
Google darabilzunean kokapen zehatza bidaltzen duzun ala ez aukeratzeko, kokapen-baimenak aktibatu edo desaktiba ditzakezu aplikazio eta webgune bakoitzean, baita gailuan ere.
Etxeko edo laneko helbidea ezarri baduzu eta Google-k etxean edo lanean zaudela ondorioztatzen badu, helbide zehatza erabiliko da bilaketa egiteko.
Zeinen zehatza da nire kokapena?
Kokapen zehaztugabea
Google-n bilaketak egiten dituzunean, zure kokapen zehaztugabea kalkulatzen du beti Google-k. Horrela, Google-k emaitza egokiak emango dizkizu eta kontua babestuta mantenduko du ezohiko jardueraren bat hautemanez gero (esaterako, beste hiri batean hasten baduzu saioa).
Kokapen zehaztugabea 3 km²-tik gorakoa da, eta gutxienez 1.000 erabiltzaile ditu; horrenbestez, ezinezkoa da bilaketaren kokapen zehaztugabearekin zu identifikatzea, eta horrek pribatutasuna babesten du.
Kokapen zehatza
Baimena ematen baduzu, Google-k zure kokapen zehatza erabil dezake. Adibidez, Google-k zure kokapen zehatza jakin behar du "inguruko izozki-dendak" eta antzeko bilaketen emaitza egokienak edo denda batera oinez joateko urratsez urratseko jarraibideak erakustearren.
Kokapen zehatzak zehazki non zauden adierazten du (esaterako, helbide jakin bat).
Nola daki Google-k non nagoen?
Zure kokapena hainbat iturburutatik lortzen da, zeinak elkarrekin erabiltzen baitira gutxi gorabehera non zauden kalkulatzeko.
Gailuaren IP helbidea
IP helbideek oinarri geografikoa dute neurri batean, telefono-zenbakien aurrezenbakien antzera. Erabiltzen dituzun aplikazioek eta webguneek, google.com barne, zure kokapen zehaztugabea IP helbideari esker kalkulatuko dutela esan nahi du horrek. Interneteko zerbitzu-hornitzaileak esleitzen dio IP helbidea gailuari, eta helbide hori ezinbestekoa da Internet erabiltzeko.
Gailuaren kokapena
Google-ren aplikazio edo webgune bati gailuaren kokapena erabiltzeko baimena ematen badiozu, informazio hori non zauden ulertzeko erabil daiteke. Ia gailu guztiek sistema eragilean integratuta dagoen kokapen-ezarpen bat dute, normalean Ezarpenak atalean.
Google-ko jarduerak
Aurrez Google-n egin dituzun bilaketetan oinarrituta kalkula dezake Google-k zure kokapen zehaztugabea. Adibidez, Mumbain zaudela "pizza" maiz bilatzen baduzu, litekeena da Mumbaiko emaitzak ikusi nahi izatea.
Etiketatutako tokiak
Etxeko edo laneko helbidea ezarri baduzu (ala biak), Google-k helbide horiek erabil ditzake gutxi gorabehera non zauden kalkulatzeko. Adibidez, etxeko helbidea ezarri baduzu eta etxetik gertu zaudela hautematen badugu (zure IP helbidearen, aurreko jardueren eta kokapenari buruzko beste informazio-iturburu batzuen arabera), etxeko helbidea erabiliko dugu gutxi gorabehera non zauden kalkulatzeko.
Nork ikus dezake nire kokapena?
Zure esku dago. Google-ren Kokapena partekatzea erabiltzen baduzu, denbora errealeko kokapena partekatu ahal izango duzu lagunekin eta familiarekin Google-ren zerbitzu guztietan.
Egiaztatu ea kokapena partekatzen ari zaren
Modu lehenetsian, Kokapena partekatzea desaktibatuta dago. Denbora errealeko kokapena partekatu nahi baduzu, norekin eta noiz arte partekatu nahi duzun aukeratu eta berretsi behar duzu. Nahi duzunean utz diezaiokezu kokapena partekatzeari.
Google-n edukia partekatzea
Zer ikus dezakete besteek Google-n edukia partekatzen dudanean?
Zer eta nola partekatzen duzun oinarri hartuta zehazten da besteek Google-ren zerbitzuetan zuri buruz ikus dezaketena:
Publikoki partekatzea
Google Maps eta antzeko aplikazioetan ekarpenak egiten badituzu, beste pertsonek zure izena eta argazkia ikus ditzakete. Adibidez, gogoko duzun izozki-denda bat baloratzen baduzu, beste pertsonek zure balorazioa, izena eta argazkia ikus ditzakete Google Maps-en denda horri buruzko informazioa irakurriz gero.
Pribatuki partekatzea
Argazkiak, bideoak, dokumentuak eta antzeko gauzak beste batzuekin partekatzen badituzu, hartzaileak zure izena eta argazkia ikusi ahalko ditu, partekatutakoaz gain.
Pentsatu ondo edukia beste batzuekin partekatu aurretik eta ziurtatu badakizula zer sarbide-maila ematen ari zaren. Adibidez, Google Drive-ko karpetetarako edo Google Argazkiak zerbitzuko albumetarako sarbidea partekatzen duzunean, baliteke jendeak sarbidea izaten jarraitzea eduki berria gehitu ahala.
Nork ikus dezake partekatzen dudan edukia, hala nola argazkiak, bideoak eta dokumentuak?
Erabiltzen dituzun Google-ren zerbitzuetan beste pertsona batzuekin eduki zehatza partekatzea aukera dezakezu.
Ez ahaztu partekatzen duzun edukia berriro parteka dezaketela beste erabiltzaileek, baita Google-renak ez diren aplikazio eta webguneetan ere.
Zure edukia kontutik ezaba dezakezu, baina horrek ez du esan nahi dagoeneko partekatu dituzun kopiak ezabatuko direnik.
Kontuz partekatzen duzunarekin, eta parteka ezazu fidagarritzat jotzen duzun jendearekin soilik.
Inoiz partekatzen al du Google-k nire informazio pertsonala besteekin?
Ez dugu partekatzen zure informazio pertsonala Google-tik kanpoko enpresekin, erakundeekin edo banakoekin, kasu jakin batzuetan izan ezik; adibidez, legeak hala eskatzen duenean.
Ikastetxearen bidez Google-ko kontu bat baduzu (Google Workspace for Education-eko kontu bat, alegia), kontua kudeatzen duen ikastetxeko administratzaileak zure informazioa atzitu ahal izango du.
Ikastetxeko administratzaileen sarbidea
Baliteke ikastetxeko administratzaileak hauek atzitu ahal izatea zure Google Workspace for Education-eko kontuan:
- Zure kontuan gordetako informazioa atzitu eta gorde (adibidez, helbide elektronikoa).
- Zure kontuari buruzko estatistikak ikusi; esaterako, zenbat aplikazio instalatzen dituzun.
- Kontuaren pasahitza aldatu.
- Konturako sarbidea eten edo amaitu.
- Kontuko informazioa jaso, lege, arau, lege-prozesu edo gobernuaren eskaera aplikagarriak gordetzeko.
- Zure informazioa edo pribatutasun-ezarpenak ezabatzeko edo editatzeko gaitasuna murriztu.
Zer arrazoi ditu Google-k zure informazioa partekatzeko?
Baimena ematen diguzunean
Adibidez, Google-ren Laguntzailea erabiltzen baduzu pizza bat eskatzeko, zure baimena beharko dugu jatetxearekin zure izena eta telefono-zenbakia partekatu aurretik. Irakurri Nola laguntzen dizu Google-k datuak hirugarrenen aplikazio eta zerbitzuekin segurtasunez partekatzen?
Domeinuen administratzaileekin, goian azaldu bezala.
Kanpoan prozesatzeko: gurekin lan egiten duten enpresei ematen diegu informazio pertsonala, datuak gure argibideei jarraituz prozesa ditzaten. Adibidez, bezeroarentzako laguntza-zerbitzua emateko erabiltzen ditugu kanpoko enpresak, eta informazio pertsonala partekatu behar dugu enpresa horiekin, erabiltzaileen galderei erantzun ahal izateko.
Legezko arrazoiengatik
Informazio pertsonala Google-tik kanpo partekatuko dugu informazio hori ematea helburu hauetarako beharrezkoa dela uste badugu:
- Lege, erregelamendu, prozesu juridiko edo bete beharreko gobernuaren eskaera aplikagarriak gordetzeko.
- Zerbitzu-baldintza aplikagarriak gordearazteko, urratze posibleak aztertzeko barne.
- Iruzurrak, segurtasun-arazoak eta arazo teknikoak hautemateko, ekiditeko, edo bestela, bideratzeko.
- Google-ren, gure erabiltzaileen edo publikoaren eskubideak urratzea eragozteko, lege aplikagarriek eskatzen edo onartzen duten heinean.
Datuak eta pertsonalizazioa
Zer datu biltzen ditu Google-k niri buruz?
Google-ren zerbitzuak erabiltzen dituzunean, zerbitzu horiek eskaintzeko, lagungarriago egiteko eta beste gauza batzuetarako behar dugun informazioa biltzen dugu, Zergatik biltzen ditu Google-k datuak? atalean azaltzen den moduan.
Ezarpenen bidez, biltzen ditugun datuak eta datu horiek erabiltzeko modua mugatzeko aukera duzu. Adibidez, YouTube-ko historia Google-ko kontuan gordetzea nahi ez baduzu, YouTube-ren Historia desaktiba dezakezu. Irakurri Nola erabaki dezaket Google-k zer gordetzen duen?
Zer dira datuak?
Zuk ematen dizkiguzun eta pertsonalki identifikatzeko balio duten datuak daude informazio pertsonalaren barruan; besteak beste, zure izena edo helbide elektronikoa. Halaber, Google-k zurekin zerikusia dutela ondorioztatu duen beste datu batzuk ere daude bertan; esaterako, Google-ko kontuan zurekin erlazionatzen ditugunak.
Informazio pertsonalaren barruan 2 datu mota daude:
Ematen edo sortzen dituzun datuak
Google-ko kontu bat sortzen duzunean, informazio pertsonala ematen diguzu; esaterako, zure izena eta pasahitz bat.
Halaber, sortzen, kargatzen edo besteengandik jasotzen duzun edukia gorde dezakezu, hala nola mezu elektronikoak eta argazkiak.
Google-n egiten dituzun gauzak
Zerbitzu hobe bat eskaintzeko biltzen dugu gure zerbitzuetan egiten dituzun jarduerei buruzko informazioa; besteak beste, bilatzen dituzun hitzak eta ikusten dituzun bideoak, harremanetan jartzeko eta edukia partekatzeko aukeratzen duzun jendea eta Chrome-ko arakatze-historia.
Google-ren zerbitzuak atzitzeko erabiltzen dituzun aplikazioei, arakatzaileei eta gailuei buruzko informazioa biltzen dugu, eta, horrela, hainbat eginbide eskain ditzakegu; esaterako, bateria gutxi duzunean pantaila iluntzea.
Zure kokapena prozesatzen dugu; adibidez, urratsez urratseko jarraibideak eta antzeko eginbideak erabiltzen dituzunean. Informazio gehiago lortzeko, irakurri Kokapena atala.
Zergatik biltzen ditu Google-k datuak?
Gure zerbitzuak eskaintzeko, zerbitzuok lagungarriago egiteko eta beste gauza batzuetarako behar dugun informazioa biltzen dugu, "Nola erabiltzen ditugu datuak?" atalean azaltzen den moduan.
Adibidez, Google Maps-i esker, zure helmugara iritsiko zara trafikoa saihestuz, zure kokapenari buruzko informazioa (zure datuak) eta datu publikoak (toki publikoei buruzko mapak eta informazioa) konbinatzen baitira.
Nola erabiltzen ditugu datuak?
Zerbitzuak emateko
Gure zerbitzuak eskaintzeko erabiltzen ditugu datuak; esaterako, bilatzen dituzun hitzak prozesatzen ditugu, emaitzak jaso ditzazun.
Gure zerbitzuak mantentzeko eta hobetzeko
Datuei esker, gure zerbitzuak mantentzen eta hobetzen ditugu. Adibidez, etenen jarraipena egin dezakegu. Bestalde, oker idatzi ohi diren bilaketa-hitzik ohikoenak zein diren jakiteak gure zerbitzuetako ortografia-zuzentzailearen eginbideak hobetzen laguntzen digu.
Zerbitzu berriak garatzeko
Datuei esker, zerbitzu berriak garatzen ditugu. Adibidez, gure lehen argazki-aplikazioan (Picasa-n) jendeak argazkiak nola antolatzen zituen ulertu genuen, eta datu horiek Google Argazkiak diseinatzen eta kaleratzen lagundu ziguten. Halaber, baliteke gure zerbitzuekin dituzun interakzioak zerbitzu horiek garatzeko eta hobetzeko erabiltzea, AA generatiboko zerbitzuak barne.
Zerbitzu pertsonalizatuak eskaintzeko, edukiak eta iragarkiak barne
Pertsonalizatutako edukia eskaintzeko erabiltzen ditugu datuak, hala nola agian gustatuko zaizkizun bideoak gomendatzeko. Ezarpenen eta adinaren arabera, baliteke zure interesetan oinarritutako iragarki pertsonalizatuak erakustea.
Errendimendua neurtzeko
Errendimendua neurtzeko eta gure zerbitzuak nola erabiltzen diren ulertzeko ere erabiltzen ditugu datuak.
Zurekin harremanetan jartzeko
Jarduera susmagarriren bat hautematen badugu, baliteke zure helbide elektronikoa jakinarazpen bat bidaltzeko erabiltzea.
Google, gure erabiltzaileak eta publikoa babesteko
Pertsonak sarean seguruago mantentzeko erabiltzen ditugu datuak; besteak beste, iruzurrak hautemateko eta ekiditeko.
Nola erabiltzen ditu Google-k datuak gauzak pertsonalizatzeko?
Gure aplikazioak eta webguneak zuri egokitzeko erabiltzen dugu biltzen dugun informazioa; besteak beste:
- agian gustatuko zaizkizun bideoen gomendioak
- Google-ren zerbitzuak erabiltzeko duzun modura egokitutako segurtasun-aholkuak (ikusi Segurtasun-egiaztapena)
Halaber, iragarkiak pertsonalizatzeko erabiltzen ditugu datuak, kasu batzuetan izan ezik (adibidez, ezarpena desaktibatuta badago edo adin jakin batzuetako pertsonentzat ezartzen bada).
Pertsonalizatzen al ditu Google-k ikusten ditudan iragarkiak?
Erakusten ditugun iragarkiak ahalik eta lagungarrien izan daitezen saiatzen gara. Hala ere, ez dugu pertsonalizatzen iragarkirik adin jakin batzuetako pertsonentzat edo Iragarkien pertsonalizazioa desaktibatuta daukatenentzat.
Edonola ere, pertsonalizatu gabeko iragarkiak lagungarriak izan daitezke. Adibidez, "oinetako berriak" bilaketari buruzko emaitzen orri bat ari bazara ikusten, baliteke kirol-oinetakoen enpresa baten iragarki bat ikustea. Litekeena da iragarkia faktore orokorretan oinarrituta egotea; besteak beste, eguneko ordua, kokapen zehaztugabea eta ikusten ari zaren orriko edukia.
Zeuk duzu kontrola
Nola erabaki dezaket Google-k zer gordetzen duen nire kontuan?
Google-ren zerbitzuak darabiltzazunean (Argazkiak, adibidez), babeskopiak egitea, argazkiak sinkronizatzea edo antzeko gauzak egitea erabakitzeko aukera ematen dizuten ezarpenak daude.
Halaber, Google-ren zerbitzuetan egiten dituzun jarduerei buruzko informazioa Google-ko kontuko historian gordetzen den edo ez erabakitzeko ezarpenak daude, baita Google-ren zerbitzuek Google-ko kontuko informazioa zerbitzuaren erabilera pertsonalizatzeko erabil dezaketen edo ez erabakitzeko aukera ematen dutenak ere.
Bilaketa-zerbitzuetako gomendio pertsonalizatuak
Bilaketa-zerbitzuek (adibidez, Bilaketa, Maps, Shopping, Hotelak, Hegaldiak, Translate eta News) Google-ko kontuko informazioan oinarritutako gomendio pertsonalizatuak eskain diezazkizuketen ala ez erabakitzeko aukera ematen dizu, hala nola profileko informazioan eta gordetako historian oinarritutakoak. Adibidez, baliteke bilaketa-zerbitzuek zure interesetara egokitutako AA bidezko erantzunak emateko erabiltzea informazio hori.
Search Services History
Bilaketa-zerbitzuetan egiten dituzun jarduerak gordetzen ditu; besteak beste, bilaketak eta erlazionatutako informazioa (esaterako, kokapen zehaztugabea). Bilaketa-zerbitzuen erabilera zuretzat egokitzeko erabiltzen dira zure jarduerak. Adibidez, idazten hasten zarenean, iraganeko bilaketak iradokizun gisa ikus ditzakezu. Google-ren zerbitzuak eta teknologiak (AAko ereduak barne) hobetzen laguntzeko eta Google, haren erabiltzaileak eta orokorrean jendea babesteko ere erabiltzen ditu Google-k Bilaketa-zerbitzuen historiako datuak.
Google Play-ren pertsonalizazioa
Google Play-k Google-ko kontuko informazioa erabil dezakeen erabakitzeko aukera ematen dizu, hala nola Google Play Store-tik erosten eta deskargatzen dituzun elementuak, erabilera are gehiago pertsonalizatzeko. Adibidez, erabiltzen dituzun aplikazioei buruzko informazioan oinarrituta ikas dezake Google Play-k, aplikazio egokiagoak gomendatzeko.
Google Play-ko historia
Google Play-ko jarduerak (adibidez, gailuan irekitzen dituzun aplikazioak) Google-ko kontuan gordetzen ditu. Jarduera horiek Google-ren zerbitzuen erabilera zuretzat egokitzeko erabil daitezke; adibidez, bilatzen dituzun aplikazioak bizkorrago aurkitzen laguntzeko.
Sareko eta aplikazioetako jarduerak
Google-ren webgune eta aplikazio batzuetako jarduerak gordetzen ditu (adibidez, Google TV-koak), haiekin erlazionatutako informazioa barne, hala nola kokapena. Halaber, Chrome-ko historia sinkronizatua eta Google-ren zerbitzuak erabiltzen dituzten webgune, aplikazio eta gailuetako jarduerak gordetzen ditu. Zure jarduerei esker, gomendio hobeak eta erabilera pertsonalizatuagoa eskaintzen dizkizugu Google-ren zerbitzuetan.
YouTube-ren Historia
YouTube erabiltzen duzunean ikusten dituzun bideoak eta bilatzen dituzun gauzak gordetzen ditu. Gomendio hobeak emateko, bideoak ikusteari utzi zenion tokitik berrekiten laguntzeko eta antzeko gauzetarako erabiltzen da YouTube-ko historia.
Gemini-ren aplikazioetako jarduerak
Google-ren zerbitzuak (AAko ereduak barne) hobetzen laguntzeko Google-ri zure Gemini-ko jarduerak (adibidez, elkarrizketak eta Gemini-rekin partekatzen dituzun fitxategiak, argazkiak eta abar) erabiltzeko baimena eman nahi diozun erabakitzeko aukera ematen dizu. Halaber, Gemini-ren aplikazioetako jarduerak beste gauza batzuetarako erabiltzen dira; adibidez, elkarrizketak utzitako tokitik berrekiteko aukera emateko.
Nola ezaba ditzaket nire datuak?
Google-ko kontuan gordetako datuak ezaba ditzakezu. Gure sistemetatik kenduko dira betiko ezabatzen dituzun datuak. Prozesu zorrotz bati jarraitzen diogu datu horiek gure zerbitzarietatik erabat kentzen direla edo, mantentzen badira, zurekin erlazionatu ezin direla ziurtatzeko.
Joan Nire jarduerak atalera Google-ko kontuan gordetako jarduerak berrikusteko (besteak beste, idatzi dituzun eskaera-mezuak eta bilatu, irakurri edo ikusi dituzun gauzak). Denbora tarte jakin bateko jarduera zehatz batzuk edo guztiak ezaba ditzakezu.
Jarduerak automatikoki ezabatzea ere aukera dezakezu.
Nola deskarga dezaket nire edukia?
Besteak beste, mezu elektronikoak, argazkiak, bideoak, dokumentuak, kalkulu-orriak, iruzkinak, kontaktuak eta egutegiko gertaerak sartzen dira zure edukiaren barruan.
Joan Deskargatu datuak atalera zure edukiaren artxibo bat sortzeko (babeskopiak egiteko edo beste enpresa batera eramateko, beste zerbitzu bat probatu nahi baduzu).
Zein ezarpen erabil ditzaket saioa amaituta daukadanean?
Google nola erabili nahi duzun erabakitzeko ezarpenak dituzu, baita saioa amaituta daukazunean ere. Saioa amaituta daukazunean, joan g.co/privacytools helbidera ezarpen hauek aldatzeko:
Bilaketa-emaitzen pertsonalizazioa
Arakatzaile honen bidez Google-n egin dituzun bilaketak erabiltzen ditu emaitza eta gomendio egokiagoak eskaintzeko.
YouTube-ren bilatzailea eta erreprodukzio-historia
YouTube-n egiten dituzun jarduerak erabiltzen ditu YouTube zuretzat pertsonalizatzeko; adibidez, ikusten dituzun bideoak eta bilatzen dituzun gauzak.
Halaber, cookie batzuk edo guztiak blokea ditzakezu arakatzailean, baina, hala eginez gero, baliteke sareko eginbide batzuek funtzionatzeari uztea. Adibidez, webgune askok cookieak gaituta eduki behar dituzte haietan saioa hasi ahal izateko.
Saioa amaituta daukaten erabiltzaileek iragarki pertsonalizatuak ikusi nahi dituzten ala ez ere aukera dezakete; dena dela, ez dugu pertsonalizatzen iragarkirik adin jakin batzuetako pertsonentzat.